خاطب بقالي سنة

هحكيلكم موقف وربنا يحاسبني على كل كلمه هقولها! خاطب بقالي سنه وان شاء فرحي ف 10،من شهر بالظبط أخويا عمل حـ,ـادثه طلع منها حى بفضل وستر ربنا بس جسمه إتبهدل ،ركب شرايح ومسامير ف رجليه الاتنين وإيديه الأتنين إتكس*روا غير كـ,ـسر ف الجمجمه والحمد لله ربنا سترها عليه ونجاه. أخويا ده ف مقام والدي وهو اللي ليا ف الدنيا ،الاب والام والصاحب . ظروفه مش أحسن حاجه وبيكافح عشان يعيش أسرته عيشه كريمه. ف الوقت ده أنا كان معايا 110الف ،كل قرش فيهم كاتب ف ورقه هيروح فين ولأيه ،منهم فلوس العفش ،وتكاليف كوافير العروسه وفستانها والسيشن . وكنت بحاول أجمع عليهم أي قرش عشان متزنقش واحتاج لحد! وقفت جنب أخويا ،عمل عملياته وربنا خد بأيده ورجع بيته والفلوس إتصرفت . كل ده وانا بفكر هقول لحمايا إيه وهل هيقدر وقفتي جنب أخويا ولا هيشوفها قله تقدير وخلف إتفاق معاه!! سكت اسبوع بحاول أرتب أفكاري وأشوف هقدر أعمل إيه قبل ما اواجه حمايا واقوله ممكن نأجل . الدنيا مقفله مفيش حاجة نافعه ولا راضيه تظبط واستحالة اقول لحد إديني وادور على جمعيات أقبضها ف ال٣ شهور الباقيين على الفرح .كله يا إما الدور ال20يا أبعد من كده!! كان معايا 20ف جيبي كل ما املك حرفياً ،روحت الماركت بشترى واحده مولتو وكنت جعان ولسا بحطها ف بوقي لقيت طفل بيشدني وبيقولي يا عمو ممكن حته ،متردتش واديتها له واشتريت له كمان واحده بال10الباقيه ،وال20جنيه دي كانت سبب الانفراجه بعد كده! يومها بالليل ،خطيبتي بتقولي متغير ليه قولتلها مفيش هقفل اصلي وبكره نتكلم.. قومت صليت القيام وبعدها مش جايلي نوم وورايا شغل الصبح ،قرأن الفجر اشتغل ،إتوضيت تاني.. الجامع له طريقين ،طريق ميتجاوزش 300متر وده دايما اللي بمشي منه للجامع وطريق تاني لفه كبيره ف حدود كيلو إلا . والله لقتني بدون ما أحس ماشي رايح للجامع من الاتجاه التاني ومأدركتش الا بعدها ب 8دقايق لما طلعت ع الطريق الرئيسي بره. وقت ما أدركت ،ضحكت على نفسي وقولت كتر التفكير والهم نعم دماغك إلحق نفسك قبل ما تحدف العيال بالطوب ف الشارع.وكملت وانا بعادتي اي طوبه او زلطه على الطريق بزقها برجلي ف جنب وماشي بسبح وبستغفر ربنا وبقول يمكن ربنا جابك من هنا عشان تاخد حسنات اكتر وانت على وضوء رايح تصلي . زلطه صغيره بزقها ف جنب برجلي ردت ف كيس أسمر ع جنب الطريق بعد ما عديت محجر الأسمنت والرمل ،خدت بالي من الكيس هو كمان روحت اشيل الزلطه بالكيس ف جنب ،حسيت بملمس الكيس انه مش جواه زباله او فضليات اي حاجه ،بفتحه لقيت 10رزم كلهم بأستك البنك !! روحت الجامع ،قبل الصلاه ،زعت ف الجامع ووالله صاحب الفلوس داخل يصلي وانا بذيع !! خلصت اذاعه لقيته جاي بيقولي انا واقع مني فلوس ف كيس أسمر بقالهم يومين وزعت ف البلد كلها موصلتش لحاجه ،قولتله كام وفئات الفلوس إيه ؟ قالي 50الف بفئه 200 و50 بفئة 100 عليهم أستك طابعه البنك وف كيس أسمر . انا جسمي وقتها قشعر من عظمة وقدرة ربنا ودماغى بتفكر وبتتعجب ف تدابيره وحكمته ،م اول ما جيت م الطريق اللي مش متعود عليه والزلطة اللي ردت ف الكيس عشان اشوفه وحلال مال الراجل ده ان ف الوقت اللي ألاقي فيه الفلوس يكون هو داخل الجامع يصلي ،مجاش ف بالي غير ان الراجل ده بينه وبين ربنا حاجه عشان يدبره له أمره بالشكل ده ويرد ضالته. بس الحقيقه أنه كان خير ليا انا وتدبير لامرى انا من ربنا بدأ من هنا ! بعد ما الراجل خد فلوسه وطلع كلامه صح ،لقيته بيديني 20الف ،بقوله بتوع إيه قالي حقك ،قولتله لأ مش حقي ده واجب وأمانه رديتها لأصحابها ،قالي خد الفلوس انت تستحقها ،محروج وببص حواليا كل الناس متابعه والابتسامه مرسومه على وشهم واجتمعوا إني اخد الفلوس ،بقوله لا وحتي كتير على نسبتي الشرعيه وانا مش محتاج حاجه فرحتي انهم رجعولك ،قالي انا استعوضت ربنا فيهم وقولت مش راجعين وندرت انهم لو رجعوا اللي لقاهم نصيبه 20 الف منهم ،من هنا لهنا خدت الفلوس. رجعت م الشغل ف نفس اليوم ،لقيت خالي عندنا ف البيت ،مبنتكلمش من 2013بسبب أكله لورث أمي ،قولت يمكن جاي عشان اخويا ،طلعت شقتي وبعدها نزلت لما مشي ،لقيت مرات اخويا بتديني 60الف ورث أمي … الموضوع كان عادي لان أخويا له نصهم وامي ربنا يعطيها الصحه موجوده ،اخويا الله يباركله قالي ربنا بيعوضك على وقفتك معايا ،الفلوس خدها كلها وتمم جوازتك . أصبح معايا 80 الف من حيث لا أدرى ،لو حد كان قالي خالك هيدي امك حقها كنت هقسم انه مستحيل لكنها ارادة ربنا . يمكن لسا محتاج عليهم مبلغ بس الحمد والمنة والشكر لله ،كأني كنت ف نص البحر مش لاقي منقذ وربنا بعتلي موجه قربتني من الشط وبقيت ف الأمان ،واتجوز ف ميعادي وعليا دين أهون وأجمل بكتير من ان خطيبتي تضيع مني . معرفش والله بحكي ليه ويمكن ناس تنتقد قصتي من طولها،بس اللي وصل لهنا أكيد حب يكمل القصه ويعرف النتيجه..يمكن مستني اشاره ،يمكن محتاج يطمن ،يمكن محتاج يتشجع على عمل الخير ،المهم إني حكيت لأني حبيت اقولكم استمروا ف الأطعام ولو بسكوته هتديها لطفل متعرفش بسببها هتعود عليك ازاي بالخير.المهم النوايا تكون لله ياريت لو حد حب يعيد نشر قصتي عنده يعملها شير ميخدهاش كوبي عشان محتاج لكل دعوه توصلي وتتخص ليا وربنا يراضينا كلنا اجمعين.