عصام بقلم روماني مكرم
كنت واقفة في المطبخ بجهز الشاي لـ “عصام” جوزي وحم,,اتي وأخته “نجلاء” بعد عزومة تقيلة بمناسبة شقتنا الجديدة في التجمع. الشقة اللي عصام أصر يكتبها باسمي عشان يثبت لي حبه ويعوضني عن سنين المرار اللي شفتها مع طليقي الله يرحمه. فجأة سمعت صوت حم,,اتي واطي بس “يسمّ البدن”: «يا واد يا عصام، إنت اتجننت؟ تروح تحط شقا عمرك في شقة وتكتبها لـ “نورا”؟ دي أرملة ومعاها عيل، يعني بكرة وأنت نايم تطردك في الشارع!»
ضحك عصام ضحكة خبيثة أول مرة أسمعها منه، وقال بصوت زي فحيح التعبان: «يا أمي إهدي بس.. “نورا” دي كنز ماشي على الأرض.. إنتي متعرفيش إن جوزها اللي م,,ات كان مخبي “شنطة” فيها دهب وسبائك في خزنة سرية في شقة قديمة؟ والهانم فاكرة إني مش واخد بالي وهي بتكلم المحامي بتاعها!» نجلاء أخته شهقت بلهفة: «دهب؟ وأنت هتجيبه إزاي يا فلحوص؟» عصام رد بمنتهى البرود: «الشقة دي “السناــ,,ـرة” اللي صيادتها بيها.. هسيسها وادلعها لحد ما تعملي توكيل إدارة، وساعتها هاخد الدهب وأرميها هي وبنتها “ليلى” بشنطة هدومهم في الشارع، وأبيع الشقة وأرجع قرشي وفوقيه بوسة!»
لحظة الصدمة جسمي اتخشب.. كان نفسي أدخل أكسر الصينية على دماغه، بس افتكرت بنتي “ليلى” اللي نايمة جوه.. لو اتعصبت ممكن يأذيني أنا وهي.. الدموع كانت محبوسة في عيني . عصام” طلع مش بس خاين، ده طلع صياد محترف وعينه على ورث يتيمة. بس اسمعي مني، اللي زيه “فكر” إنه ذكي، بس هو وقع مع الست الغلط وفي التوقيت الغلط. عقلي بدأ يشتغل زي الساعة السويسرية. مسحت دموعي بسرعة، وأخدت نفس عميق، ورسمت على وشي ابتسامة “الزوجة المخدوعة والمبهورة بجمال شقتها الجديدة”. دخلت الصينية بهدوء، وحطيت الشاي قدامهم وأنا بقول بدلع مصطنع:
«يا حبيبي يا عصام، الشاي لأحلى راجل في الدنيا.. تسلم لي الشقة يا سيد الناس، دي بالدنيا وما فيها.» بصيت في عينيه وشفت “اللمعة الجشعة” اللي كان فاكر إنه مخبيها. حم,,اته بصت لي بقرف وحاولت تداري ارتباكها، ونجلاء شربت الشاي وهي بتوزع نظراتها في الشقة وكأنها بتقيم سعر الستائر. تاني يوم الصبح، عصام نزل شغله، وأنا بدأت التحرك: * المحامي الحقيقي: كلمت محامي جوزي الله يرحمه (اللي هو صديق وفي للعائلة). حكيت له اللي حصل. قالي: “نورا، الشقة باسمك وده حقك، والدهب اللي معاكي ده أمانة بنتك، ومحدش يقدر يلمسه”.
