جوزي بيعطر جسمي
في المطبخ عملت قهوة بإيد بترتعش وياسر دخل ورايا بعد شوية وهو بيفرك عينيه وبيبتسم ابتسامته المعتادة قال صباح الخير يا ريحانة البيت زمان كنت بدوب لما يقولها لكن النهارده الكلمة نفسها خوفتني ريحانة البيت ريحة البيت ريحة كل حاجة في حياتنا بقت مرتبطة عنده بالريحة رديت بصوت عادي بالعافية صباح النور قرب مني كعادته وحاول يبوس راسي لكنه فجأة وقف لحظة وشم الهوا حواليا قال إنتي ماحطيتيش العطر؟ قلبي دق قلت له لا لسه صاحيه قالها بسرعة غريبة طب حطيه قبل ما تخرجي النهارده بصيت له وقلت وأنا بمسك كباية القهوة ليه؟ السؤال كان بسيط لكنه عمل في وشه شرخ لحظي كأنه ماكانش مستعد إن أسأله ليه قال عادي يعني بحبه عليكي قلت بس أنا مش خارجة دلوقتي قال حتى وإنتي في البيت ريحته بتريحني حاول يضحك بس ضحكته طلعت مصطنعة وسابني ودخل المكتب وهو بيقفل الباب وراه بهدوء زيادة عن اللزوم ساعتها عرفت إن مقابلة سلمى مش اختيار دي ضرورة
سلمى صاحبتي من أيام الجامعة دكتورة جلدية وتجميل وشخصيتها عملية جدًا مش من النوع اللي يهوّل ولا يخوف من غير سبب عشان كده لما كلمتها وقلت لها محتاجاكي ضروري ردت من صوتي قبل كلامي وقالت تعالي العيادة بعد آخر كشف وأنا هستناكي طول اليوم كنت بمثل إني طبيعية قدام ياسر رتبت البيت ورديت على مكالمات أمي وحضرت الغدا لكن عقلي كان في المكتب المقفول وفي الدرج وفي اللابتوب وقبل ما أنزل وقفت قدام التسريحة شفت زجاجات العطر اللي جايبهالي مرصوصة زي جنود صغيرة عشرات الزجاجات أشكال وأسماء غريبة بعضها مفتوح وبعضها لسه جديد فجأة حسيت إنهم مش هدايا حسيت إنهم أدلة أخذت واحدة صغيرة منهم وحطيتها في شنطتي من غير ما يعرف ونزلت
لما وصلت عيادة سلمى كانت الساعة قربت ستة والعيادة فاضية تقريبًا أول ما دخلت عليها لقيتها واقفة تستقبلني بقلق حضنتني وقالت مالك يا منى؟ آه نسيت أقول لكم اسمي منى منى اللي كانت فاكرة نفسها متجوزة راجل حنين لحد ما الحنية بدأت تتحول لحبل حوالين رقبتها قعدت قدام سلمى وحكيت لها كل حاجة من أول طقس الحمام والعطور الأسبوعية لحد الدرج المقفول واللابتوب والصور سلمى كانت ساكتة بس ملامحها بتتغير واحدة واحدة ولما طلعت زجاجة العطر من شنطتي ومدتها لها قالتلي بهدوء ممكن أشوفها؟ فتحتها وشمتها وبعدها ملامحها اتشدت قالت ده مش عطر عادي يا منى قلبي وقع قلت يعني إيه؟ قربت الزجاجة تاني من أنفها بحذر وقالت ريحته فيها مكونات عطرية قوية آه بس فيه حاجة تانية كأنها مادة مثبتة أو طبية مش متأكدة من غير تحليل قلت لها طبية إزاي؟ قالت مش هفتي بس بعض المواد بتستخدم لتغطية روائح معينة أو تثبيت أثر مادة على الجلد أو حتى تهييج بسيط يخلي الجلد يستجيب بطريقة معينة حسيت بطني بتتقلب قلت لها يستجيب لإيه؟ سلمى بصت لي بجدية وقالت إنتي عندك أي حساسية جلدية الفترة الأخيرة؟ حكة احمرار اسمرار غير طبيعي بقع صغيرة بتظهر وتختفي؟ سكتت لأن فجأة افتكرت حاجات كتير افتكرت إن جلدي في أماكن معينة كان بيحمر بعد العطر وكنت أقول طبيعي عشان الاستحمام بالمية السخنة افتكرت إن فيه علامات خفيفة كانت بتظهر وتروح وكنت أفتكرها من الملابس أو الجو افتكرت إن ياسر كان دايمًا يسألني العلامة دي ظهرت إمتى واللون ده من إمتى بطريقة تبدو اهتمام لكن دلوقتي بقت تحقيق
