كنزي لبسه نضاره

وعدت الايام وكنزي بقت تروح الكمين كل يوم مش عشان تنتقم، عشان تشوفه بس، بقت تستنى الوردية بتاعته وتظبط مواعيد شغلها عليه، حتى البراندات اللي كانت بتتعامل معاها بقت تقولها انتي اتأخرتي ليه؟ تقولهم عندي كمين، قصدي عندي تصوير مهم، وشادي كمان بقى يستنى اليوم اللي بتعدي فيه كأنه عيد، يلمع البيادة ويرش البرفان ويقف يبص في المراية كل شوية، العساكر بقوا يحبوا كنزي عشان كانت بتجيب لهم قهوة وشاي وتقعد تهزر معاهم. في مرة كنزي كانت طالعة لايف وهي سايقة، وشادي وقفها هزار وقالها على فكرة هكتب لك مخالفة عشان بتتكلمي في التليفون وانتي سايقة، كنزي قالت له في اللايف شايفين؟ بيستغل سلطته، ده ظلم، المتابعين ماتوا من الضحك وكتبوا احنا عايزين ظابط زي ده يوقفنا كل يوم، ومن ساعتها اللايفات بتاعتهم سوا بقت تريند، الناس بقت تستنى يشوفوا ظابط وبلوجر، القصة بقت مشهورة في زايد كلها. هاجر في مرة قالت لها خدي بالك يا كنزي، الحب اللي بيجي بعد وجع بيبقى قوي، بس لو ما اتعالجش صح بيفضل يوجع، لازم تقعدي معاه وتتكلموا بجد، مش هزار ودلع بس، كنزي سمعت كلامها، وفي يوم قعدت مع شادي في عربيته بعد ما خلص شغله، قالت له انا عايزة اقولك حاجة من غير هزار، انا طول عمري كنت بحس اني قليلة عشانك، عشان كنت بتتريق عليا وتضربني، ودخلت مجال البلوجر عشان اثبت اني حلوة وان الناس بتحبني، وكل ده كان بسببك انت، شادي سكت شوية وبعدين قالها وانا دخلت شرطة عشان اثبت اني مش بلطجي صغير بيضرب بنت، انا كنت بكره نفسي كل مرة اضربك فيها، بس ما كنتش عارف ابطل، كنت فاكر اني كده ببقى راجل. ساعتها بس كنزي فهمت انهم الاتنين كانوا مجروحين من نفس الحكاية، هي وهو، وان الانتقام عمره ما كان حل، وان الانوثة مش سلا..ح عشان توجع حد، الانوثة قوة عشان تطبطب وتسامح، حضنته وقالت له خلاص احنا كبرنا، واللي فات مات، احنا نبدأ صفحة جديدة، بس المرادي انت اللي هتكون بتاع ابتدائي وانا اللي هاخد منك المصروف، شادي ضحك وقالها موافق، خدي المرتب كله. اخر مشهد كان فرح سندس، سندس اتخطبت لكريم صاحب شادي، وكنزي كانت واقفة لابسة فستان سواريه وشادي لابس البدلة الميري، وكانوا بيرقصوا سلو، وكل الناس بتبص عليهم، هاجر قالت لعمار شايف؟ الحب اللي بدأ بضرب في الشارع انتهى برقص في فرح، عمار قال اه، وانا اللي كنت فاكرهم هيولعوا في بعض، شادي وطى على ودن كنزي وقالها فاكرة لما قلتي لي كنت بتاعة ابتدائي؟ قالت له اه، قالها انتي لسه بتاعة ابتدائي، بس بتاعتي انا لوحدي، كنزي ضحكت وقالت له وانت لسه الواد الرخم اللي بياخد المصروف، بس الرخم بتاعي انا لوحدي، ولفوا يرقصوا والناس كلها بتسقف، كأن الدنيا كلها بتحتفل ان حب المراهقة رجع بعد ما كبر ونضج