عايزه خدامه

بقولك ايه انا عايزه خدامه أنا مابقتش قادره على الخدمه

ـ اجيب منين مرتب شهرى لخدامه أنا

ـ خلاص اتجوزلك واحده تانيه تنضف وتروق وتكوى وانا سبنى اركز فى شغلى انا داخلية على ترقيه هتنقلنى ناقله تانيه ووقتها ابقى طلقها وأنا اجيب خدامه على حسابى بس انا الفتره دى مش فاضيه غير لشغلى

وبعدين يا سيدى انا هنزل اقعد مع مامتك تحت هاخد اوضه نومى دى وحاجتى الاساسيه وانزل اعيش تحت مع والدتك وبكده اللى هتتجوزها وانت مش هيكون عندكم مشاكل فى المكان

ـ وليه تقعدى فى شقه امى

ـ امال اعيش فين شقه امك كبيره اكبر من شقتنا بكتير رغم اننا فى نفس العماره وفرشها اغلى وكده كده مراتك الجديده هتنزل لامك تنضفلها وتروقلها الشقه تحت وانا اجى من الشغل الاقى الشقه رايقه والغدا جاهز على الاقل اضمن انى اكل أكل بيتى

اكتشاف المزيد
رومانسية
كتب إلكترونية
تطبيقات وإضافات الجوال

ـ وياترى مين دى بقى اللى تقبل بكده

ـ هو أنت لازم تقولها انت متجوزها ليه اى واحدة تقع فى ايدك محتاجه تتجوز اتجوزها مطلقه بقى ارمله أى حاجة

اتصدمت من كلام مراتى وازاى بتفكر بالشكل ده ولما كلمت والدتى اتفاجئت انها كمان مرحبه بالفكره وقالتلى مراتك عندها حق والمشكلة خلاص اتحلت اتجوز واحده تشوف طلباتك ايه وتخلف منها حته عيل وبصراحه امى فعلاً اللى كبرت الموضوع فى دماغى

سالتها ومين اللى توافق تتجوز واحد متجوز

لقتها رشحت بنت خالتى قاعده فى شقه ابوها بعد ما جوزها طلقها عشان مابتخلفش وقاعده لوحدها لا انيس ولا جليس وطالما انا بدور على حد فهى أولى من الغريب

وفعلاً كلمت انى هنا بنت خالتى وفى الأول رفضت لكن امى قدرت تقنعها بطريقتها ومراتى كمان راحت وقالتلها اننا شبه منفصلين بس انا مستنيه ترقيه كده واطلق وانا مش عايزه أطلق عشان احافظ على شكلى الاجتماعي وفعلاً هنا وافقت ومراتى اخد اوضه نومها ونزلتها عند امى وظبطت الشقه باللى يناسبها وأمى وافقت وسابتها تعمل اللى هى عايزاه براحتها

وفعلاً اتجوزت بنت خالتى وكانت عكس مراتى فى كل حاجة مكنش ليها طلبات خالص وكانت بتخجل تطلب منى حاجه ومشيت الحياه زى ما مراتى رسماها بالظبط مراتى كانت بتنزل لامى تنضفلها الشقه وكانت بتحضر الغدا لامى كل يوم كنا نتغدى ونطلع شقتنا ويوم مراتى نهله ببات تحت عند امى والأيام مرت بالشكل ده مراتى الجديده بقت تقريباً خدامه لمراتر القديمه من غير ما تحس او تشتكى حتى المكوه كانت بتكولها هدومها وتروقلها اوضتها