خطيبه جوزي كـاملة بقلـم أماني سيد
كوثر بدأت ترتب أفكارها عشان تاخد حقها تالت ومتلت كوثر عارفة إن حماتها بتهتم جداً بكلام الناس في المنطقة. قررت إنها مش هتمشي سكتة. لو حسام عايز يتجوز الأميرة بتاعته، يبقى لازم يدفع الثمن قدام الجيران والقرايب. فكرت إنها لو فضلت قاعدة على قلبهم، والناس عرفت إن حسام جايب ضرة في سنة أولى جواز، وصورة الخيانة دي اتنشرت، حماتها مش هتعرف ترفع عينها في حد.
بدأت عين كوثر تلف في الأوضة.. العفش، السجاد، النجف. صحيح الشقة مش ملكها، بس القايمة ملكها. فكرت ببرود لو خرجت، مش هسيب مسمار في الحيطة. هاخد عفشي كله، وأسيب لنهى الشقة بلاط.. تفرشها هي بقى من مال حسام اللي قل من النص. أول حق لازم تستردّه هو مجهودها. قررت من اللحظة دي إن الخدامة ماتت. مش هتنزل تخدم حماتها، ولا هتعمل لقمة لحسام. هتطبخ لنفسها بس، وتغسل هدومها بس. هتخليهم يحسوا بقيمة الكنز اللي كان تحت إيدهم وضيعوه، وتجبر حسام إنه يصرف عليها وعلى أكلها وهي قاعدة مربعة في شقتها، وإلا المحاكم موجودة.
كوثر افتكرت إن حسام وحماتها بيتكلموا بجرأة غريبة. طلعت موبايلها وحطته في جيب عبايتها، وقررت إن أي مواجهة جاية لازم تتسجل. كلام حماتها عن التصبيرة والدوا وخطتهم لرجوع نهى، لو اتسجل، هيكون أقوى سلاح في إيدها لو فكروا يرموها أو يتبلوا عليها بشيئ يمس شرفها. فجأة، سمعت صوت خناقة بره في الصالة.. صوت نهى وهي بتزعق بدلال ممزوج بغضب لا يا حسام! أنا مش هقبل أعيش في بيت واحدة بتبص لي النظرات دي.. إنت قلت لي إنها هادية وغلابة، دي طلعت لسانها أطول منها! اتصرف يا حسام، يا أنا يا هي في البيت ده!
رد حسام كان مخنوق يا نهى اهدي، هوديكي فين دلوقتي؟ الشقة الجديدة لسه بتدهن، وأمي محتاجة حد يخدمها هنا.. اصبري عليا كام شهر. كوثر ابتسمت بمرارة وقالت لنفسها لسه يا حسام.. لسه المشاكل مبدأتش.. إنتوا اللي فتحتوا باب جهنم، واستحملوا بقى الحريقة. فتحت كوثر الدولاب ببرود، طلعت عباية خروج سوداء شيك، ووقفت قدام المراية تظبط طرحتها وهي سامعة نهى بتدلع بره وحسام بيحاول يرضيها. ملامح كوثر كانت جامدة، مفيش دموع، مفيش رعشة.. فيه تار بايت لازم يتاخد بالهداوة.
خرجت من الأوضة بكل ثقة، الصالة سكتت فجأة. حسام ونهى وحماتها بصولها باستغراب، كانت لسه لابسة عباية البيت من شوية ودلوقتي كأنها رايحة فرح. حسام باستنكار على فين يا هانم في وقت زي ده؟ ومن غير إذن؟ كوثر وهي بتلبس ساعتها وبتبص له بمنتهى الاستخفاف الإذن ده تطلبه من الهانم اللي جنبك يا حسام، إنت خلاص فقدت صلاحية إنك تكون راجل البيت ده بالنسبالي. أنا نازلة أجيب محامي، ورايحة لأخويا عشان يجي يخلص الليلة دي.
