خطيبه جوزي كـاملة بقلـم أماني سيد
حماتها بشهقة محامي وأخوكي؟ جرى لك إيه يا بت يا كوثر؟ عايزة تفضحينا وتجيبي لنا الحكومة والناس في بيت العيلة؟ كوثر وقفت قدام حماتها وبصت لها في عينها الفضيحة إنتي اللي عملتيها يا حماتي لما بعتي ابني تصبيرة.. الفضيحة لما استغليتوا بنت ناس وخدمتكم سنة وفي الآخر عايزين ترموها عشان حنين ابنك رجع. أنا مش هعمل فضيحة، أنا هاخد حقي.. القايمة بتاعتي اللي فيها العفش اللي نهى قاعدة عليه دلوقتي، والمؤخر، ونفقة المتعة عن كل يوم قضيته خدامة ليكم.. وكل ده هيتجاب بالقانون وبالذوق، والناس كلها لازم تعرف إن حسام اتجوزني كوبري عشان يرجع لحبيبته.
نهى ببرود وهي بتهز رجلها يا حبيبتي روحي للمحامي براحتك، إحنا مش خايفين.. حسام معاه قرشين يخلص بيهم أي قضية، وأنا مش هسيب شقتي وعفشي عشان واحدة زيك. كوثر ابتسمت بمرارة ولفت لنهى عفشك؟ ده العفش اللي أبويا دفع دمه فيه يا دكتورة.. ده العفش اللي أنا مسحته بدموعي وتعبي. لو فاكرة إنك هتقعدي فيه وتهنئي، تبقي متعرفيش كوثر. أنا هرفع قضية تبديد وهخلي المحضر يجي يشيل العفش ده مسمار مسمار قدام الجيران كلهم، وهتفرشي الشقة دي بلاط لغاية ما حسام يشوف هيجيبلك منين والسيولة اللي معاه قلت النص.
حسام وشه بقى ألوان، كلام كوثر عن المحاكم والناس لمس الوتر الحساس عنده، هو عايز يتجوز في هدوء ومن غير شوشرة تضيع بريجه قدام نهى وأهلها. حسام بصوت واطي فيه تهديد إدخلي أوضتك يا كوثر وبلاش جنان، مفيش خروج من البيت ده. كوثر طلعت موبايلها وشغلت تسجيل كان شغال من أول ما خرجت الصالة
التسجيل ده فيه كل كلمة قولتوها النهاردة.. اعتراف أمك بالخطة، واعترافك بإنك اتجوزتني غيظ فيها، واستهزاء نهى بيا. لو مديت إيدك أو منعتني أخرج، التسجيل ده هيكون على صفحة منطقة بيت العيلة وعلى جروب العيلة كله في ثانية.. اختار يا حسام، نخلص بالمعروف وتديني حقوقي وأمشي بكرامتي، ولا نخلص بالفضيحة اللي هتخلي نهى نفسها تتكسف تمشي جنبك في الشارع؟ حسام بص لأمه بصدمة، وحماتها برقت عيونها برعب، نهى وشها بقى شاحب، اللعبة اللي كانوا فاكرينها سهلة طلعت كمين وكوثر كانت أذكى منهم كلهم.
حسام وقف مكانه والدم غلي في عروقه، بس كلمة فضيحة وتسجيل لجمت لسانه. هو عارف إن نهى وأهلها ناس بتوع منظرة، ولو عرفوا إن جوازته من كوثر كانت مجرد لعبة أو تصبيرة زي ما أمه قالت، ممكن ينسحبوا فوراً عشان برستيجهم. حسام بصوت واطي وهو بيحاول يداري رتبته قدام نهى إنتي فاكرة إن الحركة دي هتهزني؟ امسحي التسجيل ده فوراً، وبلاش تخلي عيشتك معانا جحيم يا كوثر.. أنا كنت ناوي أسيبك هنا معززة مكرمة، بس إنتي اللي بتختاري السكة الصعبة.
