خطيبه جوزي كـاملة بقلـم أماني سيد
حسام بصوت فيه سخرية وغضب جرى إيه يا كوثر؟ فوقي لنفسك.. إنتي ناسية إنتي واقفة في بيت مين؟ ده بيت أبويا، يعني لا ليكي كلمة ولا ليكي حكم هنا. إنتي موجودة بجميل مني ومن أمي، ولو مش عاجبك الوضع وعايزة تفتحي صدرك، الباب يفوت جمل، تخرجي بشنطة هدومك زي ما دخلتي. حماتها وهي بتسند نهى اللي بدأت تمثل إنها تضايقت
سمعتي يا اختي؟ فاكرة إن ليكي صوت في البيت ده؟ ده إحنا جايبينك عشان تخدمينا وتريحينا وتملي مكان لغاية ما صاحبة النصيب ترجع، مش عشان تطلعي لنا لسانك. قومي يا نهى يا بنتي، متزعليش نفسك، دي غيرة ستات فاضية ومقامك أعلى من كدة بكتير. نهى بصوت واطي وخـ .ـبث وهي بتبص لظوافرها خلاص يا حسام، أنا مكنتش أعرف إن وجودي هيعمل المشاكل دي.. أنا قلت نيجي نتعرف عشان نعيش في تبات ونبات، بس الظاهر إن فيه ناس مش حابة الخير لغيرها.
كوثر ضحكت بوجع حقيقي ومرارة هزت أركان الصالة خير؟ هو إنتوا سبتوا خير أصلاً؟ إنتوا دستوا على كرامتي وسمعتي وضحكتوا عليا سنة كاملة.. كنت تصبيرة يا حسام؟ كنت دوا لجرحك؟ بصت لنهى وقالتلها بكلمات زي الرصاص مبروك عليكي يا نهى.. مبروك عليكي راجل وافق يمثل الحب على واحدة تانية سنة كاملة عشان يغيظك. تفتكري اللي قدر يمثل الحب والاهتمام وهو قلبه مع غيري، مش هيجي يوم ويمثل عليكي إنتي كمان؟ اللي خان عشرة السنة، مش هيصون عشرة العمر يا دكتورة.
حسام قرب منها بغل وعيونه شرار، ورفع إيده وكأنه هيض ربها، لكن كوثر مقدمتش خطوة لورا، بالعكس، قربت وشها منه وقالتله بمنتهى الثبات
اض رب يا حسام.. كمل رجولتك قدام ست الحسن واض رب مرتك اللي صانتك وخدمت أمك. بس افتكر حاجة واحدة.. البيت ده بيت عيلة، والناس برا بتسأل وبتشوف. لو طردتني النهاردة بشنطة هدومي، الكل هيعرف إنك كنت محلل لرجوع حبيبتك، وإنك استعملت بنت الناس كوبري. أنا مش هخرج يا حسام.. أنا هقعد هنا، في الشقة دي، هتشوفوني كل يوم وكل ساعة، هكون الوجع اللي بيفكركم بظلـ .ـمكم، هقعد عشان أخد حقي في الخدمة اللي خدمتها لأمك باللقمة والهدوم، لغاية ما أشوف نهايتكم بعيني.
سابتهم في حالة من الذهول والخرس، ودخلت أوضتها ورزعت الباب وراها بكل قوتها. سندت ضهرها على الباب وهي بتنهج، ودموعها نزلت بصمت، بس المرة دي كانت دموع تحدي مش انكسار. داخل الأوضة اللي كانت فاكراها عش الزوجية وبقت فجأة زنزانة، قعدت كوثر على طرف السرير. دموعها نشفت وحل محلها نظرة حادة، عقلها بدأ يشتغل زي المكنة. هي عارفة إنها في بيت عيلة، يعني الخروج منه بشنطة هدومها معناه إنها خسرت كل حاجة سمعتها، سنين من عمرها، وخدمتها اللي راحت بلاش.
