خطيبه جوزي كـاملة بقلـم أماني سيد
لما دخلت الصالة، كان حسام قاعد جنب نهى على الكنبة، بيفرجلها على صور شقتهم الجديدة على الموبايل، وبيضحكوا بصوت عالي. كوثر وهي بتحط الصينية اتفضلوا القهوة. نهى وهي بتاخد الفنجان تسلم إيدك يا قمر.. ريحتها حلوة قوي. نهى بميوعة وهي بتمسك فنجان القهوة تسلم إيدك يا كوكو.. حسام قالي إنك شاطرة في القهوة قوي، ويا ريت بقى تعلميني الطريقة عشان حسام مبيحبش يشربها من إيد حد غير اللي بيحبهم. كوثر بلعت ريقها اللي بقى زي المرار، وبصت لحسام اللي رفع عينه فيها ببرود وقال
واقفة ليه يا كوثر؟ روحي هاتي طبق حلويات من اللي كنت جايبه إمبارح.. نهى لازم تدوقه. كوثر بصوت هادي قوي لدرجة تخوف الحلويات خلصت يا حسام.. أصلها كانت تصبيرة برضه، وزي ما حماتي قالت، الحنين للحلويات غلاب، فخلصتها كلها وأنا قاعدة بفكر في كلامها. حسام عقد حواجبه باستغراب من لهجتها، لكن حماتها اتدخلت بسرعة وهي بتبرق لكوثر جرى إيه يا بت؟ ما تروحي تشوفي أي حاجة تقدميها للهانم، بلاش تطلعي خيبتك قدامها وتكسفيني.
كوثر بصت لحماتها بنظرة خلت العجوزة تسكت أكسفك؟ هو لسه فيه كسوف أكتر من اللي أنا فيه؟ وبعدين لفت وشها لنهى اللي كانت بتبص لها بابتسامة نصر مستفزة، وقالتلها منورة يا دكتورة.. منورة بيت العيلة اللي مكنتيش طايقة تدخلي عتبته. مبروك عليكي حسام، ومبروك عليه الرجوع لحـ .ـضنك. حسام بصوت عالي وهو بيقوم يقف كوثر! الزمي حدودك، إنتي عارفة نهى بالنسبة لي إيه، وبلاش شغل الضراير ده. كوثر ضحكت ضحكة قوية ووجعها باين في عيونها
شغل ضراير؟ لا يا حسام، أنا مش ضرتها.. أنا كنت المحلل لرجوعكم لبعض، كنت الخطة اللي أمك رسمتها عشان تذلك وترجعك. إنتوا الاتنين استعملتوني زي المنديل ورميتوني أول ما ريحة الحب القديم هلت.
بصت لنهى وقالتلها بكلمات زي الرصاص مبروك عليكي يا نهى راجل وافق يفرط في مراته اللي صانته وخدمت أمه سنة كاملة عشان شرط منك. تفتكري اللي فرط في الأولى عشان يغيظك، مش هيفرط فيكي إنتي كمان لما يزهق أو تظهر تصبيرة جديدة في حياته؟ حسام وقف مذهول من لهجة كوثر اللي عمره ما سمعها منها، ونظرة عينها اللي مكسرتش قدامه. كان فاكر إنها هتعيط وتترجاه ميسيبهاش، أو على الأقل تسكت وتخدمهم وهي مكسورة ومنحنية الراس.
