مصطفي وليلي
مصطفي : هيشفونا النهارده بكرا هنكون انا وهي قدام الكل متجوزين يا حج غفران
غفران : ادخلي البسي يا ليلي ؟
” ليلي جريت بسرعه تلبس بفرحه واسراء وشهد جريو عليها وبسمله كانت وقفه قدام غالب ودا خلي ابوها ياخد باله وبرق ليها انها تدخل علي جوا ”
احلام جابت الشاي وحطيته قدام مصطفي وغالب اللي قعدو علي الكنبه : اتفضلو الشاي يا رجاله
غالب : متشكر يا غاليه والله بقولك يا درش انا همشي انا علشان تعد مع خطيبتك سويه وانا هروح علشان اشوف الخيمه اللي جدك بيقول عليها دي
مصطفي : اشطاا يا ابو الغوالب بسلامه يا كبير ” ومشي ”
غفران : وانت اخبارك المزرعه بتاعتكم ايه ؟
مصطفي وهو بيشرب الشاي : المرض المنتشر الفتره دي جدري البقر تقريبا بنسبة 80٪ هينتشر لو متقاومش
غفران بتركيز : ودا هيتقاوم امتي ؟
مصطفي : اهو بنحاول بنقاومه والله ” وليلي كانت طلعت وهي لبسه جيبه بيضه وهيكول ابيض وجاكت جلد اسود وطرحه سودا وجزمه سودا ”
ليلي ببتسامه : انا خلصت يلا
مصطفي بص ليها من فوق لتحت وهو بيشرب الشاي : اقفلي الجاكت دا علي صدرك ؟
” ليلي بصت ليه بغيظ ”
مصطفي رجع بص ليها بنظره هي عرفاها : سمعتي بقولك ايه اقفلي الجاكت ؟
ليلي برجاء : شكله كدا حلو والله علشان خاطري سيبه
مصطفي حط الكوبايه علي الصينيه وبص ليها : تمام يلا ادخلي علي جوا والله العظيم ما احنا خرجين ” وبص لغفران ” اسمع يا حج غفران انا همشي بالعادات والتقاليد وهاجي بكرا اطلبها بالاصول وحاليا ليلي امانه عندكم
ليلي :والخروووجه انا لبست ؟
مصطفي: اتلغت علشان الكلمه تتسمع من اول مره ويلا ادخلي اقلعي الهدوم دي ميتقعدش بيها ” وبص لغفران ” تمام ياحج
غفران اعجب بطريقه مصطفي مع ليلي وفعلا لقي ليلي حاجه تانيه مع مصطفي : نورت يابن الجبراني
” مصطفي مشي وهو بيكلم غالب في الفون ”
جمال بص لجده الهادي بغضب : شايفك مبسوط ؟
غفران : اووي اووي واجهزو علشان كتب كتاب ليلي هيكون بكرا عاوز طبخ محصلش يا حريم البيت ” ومشي علي اوضته ”
” ليلي دخلت اوضتها وبصت للبنات بفرحه ”
ليلي : انا في حلم صح؟ مستحيل اكون في الحقيقه ابدا ؟ كان بيطلب مني امبارح نهرب والنهارده اتحدد كتب كتابي وبمزاج الكل كمان هصوووت من الفرحه ؟
