مكه وقفه في نص الصوان
اسراء مرات اياد اللي كانت بتغير من مكة من يوم ما جت عشان مكة كانت حلوة وبيضا وعينيها عسلي وشعرها طويل قالت بسماجة ما كل الناس بتعمل كده يا مكة ده ستر ليكي بدل ما تاخدي بعضك وتمشي بولدنا وتتبهدلي في القاهرة ولا تتجوزي واحد غريب يبهدل ابن وليد.
مكة قامت وقفت وقالت ابن وليد في بطني ومحدش هياخده مني وانا مش هتجوز غصب عني.
الحاجة اسيل قامت حضنتها بالعافية وقالت يا بنتي محدش هيغصبك بس فكري فيها احنا هنسيبك تمشي تروحي فين وانتي حامل كده هتصرفي منين وهتولدي فين ومين هيقف جنبك سعيد واد طيب وحنين وهيراعي ربنا فيكي وفي ابنك.
دخل سعيد الصغير من برا كان سامع كل حاجة ووشه احمر زي الطماطم وقال يا بوي انا مش موافق انا مش عاوز اتجوز بالطريقة دي انا مش هينفع اتجوز مرات اخويا انا لسه صغير ومش عاوز اشيل هم.
ابوه الحاج سعيد قام ضربه بالقلم على وشه قدام الكل وقال هتتجوزها يعني هتتجوزها ده عرض اخوك وشرفه والواد اللي في بطنها ده هيشيل اسمك غصب عنك انت وانت رجلك فوق رقبتك والا لا انت ابني ولا اعرفك.
سعيد حط ايده على وشه ودموعه نزلت وبص لمكة اللي كانت بتعيط هي كمان ومشي طلع برا البيت.
فضل الموضوع شد وجذب شهر كامل ومكة حاولت تكلم ابوها في التليفون ابوها قالها يا بنتي انا مقدرش اخالف اهل جوزك دول صعايدة ممكن يقت..لوكي فيها انتي وافقي ده ستر ليكي وانا مش هقدر اصرف عليكي انتي وحتة عيل.
مكة حست ان الدنيا كلها قفلت في وشها وان ملهاش مخرج وانها لو ممشيتش معاهم ممكن بجد يعملوا فيها حاجة او ياخدوا منها الولد بعد ما تولد.
وفي يوم الصبح بدري دخلوا عليها قالولها قومي البسي هنكتب الكتاب بعد صلاة العصر مفيش فرح ولا زفة هو كتب كتاب بس عشان العدة خلصت على كلامهم طبعا هي عدتها لسه مخلصتش بس هما قالوا دار الافتا قالت يجوز عشان الحمل.
مكة لبست عباية سودة وطرحة سودة ونزلت تحت لقت سعيد لابس جلابية بيضا ووشه مقلوب ومش طايق نفسه ولا طايقها والمأذون قاعد وبيكتب الكتاب والحاج سعيد بيقول على بركة الله جوزتك بنتي مكة على سنة الله ورسوله على اسم جوزك.
الجملة دي فضلت ترن في ودانها على اسم جوزك على اسم جوزك يعني هي بتتجوز اسم مش بني ادم.
