السكرتيره حكايات روماني مكرم
الهواء بقى تقيل لدرجة إن هناء حست إنها بتغرق وهي واقفة مكانها. بصّت له، صوتها خارج بالعافية: “الخاتم ده… إيه حكايته؟” عاصم الشافعي سحب إيده بسرعة، كأنه اتلسع. ملامحه بقت جامدة، بس عينه خانته. قبل ما يرد، كمال الدسوقي ضحك ضحكة قصيرة: “واضح إنك ماحكيتلهاش كل حاجة يا عاصم.” عاصم صرخ فيه: “اخرس!” لكن كمال كان مستمتع. “الخاتم ده مش إكسسوار. ده ختم. ختم عضوية.” هناء قلبها خبط في ضلوعها. “عضوية في إيه؟” كمال قرب من المكتب، صوته بقى أوطى وأخطر:
“في مجموعة اسمها الدائرة.” الاسم وقع في الأوضة زي حجر. “رجال أعمال، قضاة، قيادات… شبكة نفوذ بتتحكم في قرارات أكبر مننا كلنا. اللي يدخلها، ما يخرجش.” هناء بصّت لعاصم، عيونها مليانة أسئلة وخوف. “أنت… كنت واحد منهم؟” الصمت طال. وأخيرًا، عاصم قال بصوت مبحوح: “كنت… مرشح.” الكلمة أخف من الحقيقة. كمال هز راسه. “لا. كنت أكتر من كده. كنت أصغر عضو يدخل الدائرة في وقتها. موهبة قانونية نادرة. كنت سـ,ـلاحهم الجديد.” هناء رجعت خطوة. “يعني… أنت وافقت تدخل اللعبة؟”
عاصم بص لها مباشرة، لأول مرة من غير دفاع. “وافقت… عشان أحميكم.” كمال قهقه. “تحميهم؟ ولا تطلع أسرع؟” عاصم تجاهله وكمل: “أنا اكتشفت بعد شهور إنهم مش بيلعبوا سياسة بس. كانوا بيسقطوا ناس، بيدمروا عائلات، وبيغسلوا مليارات. ولما رفضت أكمّل… قالولي إن الانسحاب تمنه غالي.” هناء همست: “وأمي عرفت؟” “عرفت.” صوته انكسر لأول مرة. “ولما حاولت تبعدك عنهم… حصل اللي حصل.” كمال صفق ببطء. “بس نسيت أهم تفصيلة.” مد إيده وخبط على الفلاشة. “الفيديو اللي عليها مش بس اعتراف أمك.
فيه مشهد ليك… وأنت بتوقّع على أول عقد رسمي مع الدائرة.” هناء حسّت الأرض بتهتز تحتها. “يعني إيه؟” كمال ابتسم ببرود: “يعني لو الفيديو ده خرج… اسم عاصم الشافعي هينتهي في يوم واحد.” الصمت كان مرعب. عاصم قال بهدوء غريب: “إنت عايز إيه؟” كمال لف حواليهم وهو بيتأمل المكتب. “قضية جديدة. أرض في الساحل… عليها مشروع بمليارات. في ورثة معترضين. محتاجين محامي يخلّص الموضوع قانونيًا… ونضيف.” هناء فهمت. “يعني عايزينه يزوّر؟” كمال رد بابتسامة جانبية:
“نسميها… إعادة ترتيب أوراق.” عاصم قال بحزم: “مش هحصل.” كمال وقف قدامه مباشرة. “يبقى هناء هتدفع التمن.” التهديد المرة دي كان واضح وصريح. هناء شهقت. “أنا مالي؟!” كمال بص لها بنظرة باردة: “إنتِ بنت الراجل اللي خان الدائرة… حتى لو هو فاكر إنه انسحب. والدم… بيورّث.” قلبها اتقبض. لكن فجأة… عقلها ربط حاجة خطيرة. “استنى.” قالتها بسرعة. “لو أمي سجلت فيديو بالحقيقة… ليه ما استخدمتوش تحمي نفسها؟” كمال سكت لحظة أطول من اللازم. عاصم لاحظ.
