مفتاح الخزنه انجى الخطيب

بعد تلات شهور سفر وشغل بره، رجعت بيتي لقيت مراتي خاسة أكتر من عشرة كيلو.. بس اللي جمد الدـ,ـم في عروقي بجد هو اللي عرفت إنه بقى عايش جوه بيتي.
اسمي إياد فوزي.
من تلات شهور، سيبت القاهرة وسافرت أسوان عشان مشروع تأمين وحراسة كبير هناك. الصبح اللي سافرت فيه، مراتي نور كانت زي الورد. هادية، ملامحها مرتاحة، والضحكة اللي على وشها كانت دايماً بتحسسني إن مهما الدنيا ضاقت، البيت هيفضل أماني لما أرجع.
بس لما رجعت.. والله ما عرفتها.
كانت مستنياني في المطار، وللحظة افتكرتها واحدة تانية خالص. كانت لابسة تيشيرت قديم وبهتان.. عضم رقبتها بارز..

وشها شاحب وخاسس جداً.. وعينيها كان باين فيها سهر وتعب بقاله أسابيع.
ابتسمت لي بوجع وقالت حمد لله على سلامتك يا إياد..
صوتها كان واطي، مخنوق، طالع بالعافية.
حسيت بوجع في صدري وقتها نور.. إيه اللي حصل لك؟ إيه اللي عمل فيكي كده؟
بصت في الأرض بسرعة وقالت مفيش.. تلاقيني بس مجهدة شوية من قلة النوم.
كنت عارف إنها بتكذب، بس مكنتش متخيل الكذبة واصلة لفين. الحقيقة خبطت في وشي أول ما دخلنا فيلتنا في التجمع.. أول ما خطيت عتبة الباب.. دمي اتجمد.
فيه ناس غريبة عايشة في بيتي!

تلات عيال بيجروا في الصالة، بيتنططوا على عفشي وكأنه مِلكهم. راجل غريب ممدد على الكنبة وحاطط رجله بالجزيرة على ترابيزة الصالون، وماسك الريموت بيقلب في التلفزيون وكأنه هو اللي دافع تمنه. وست حاطة مكياج تقيل وقاعدة على الكرسي بتبص في أركان البيت بنظرات فاحصة، كأنها بتسعّر العفش.
وقفت مكاني مذهول.. ونور حتى مكنتش قادرة تبص في عيني. قالت لي بسرعة اتفضل ادخل.. وجريت على المطبخ.
مشيت ورا صوت خبط الحلل والزعيق.. المطبخ كان عامل زي الساحة، دخان في كل حتة، دوشة وتوتر يخنقوا. وفي وسط كل ده، كانت أمي واقفة بتزعق
يا نور! فين صوص الصويا؟

كام مرة هقولك الحاجه تفضل في مكانها؟
غمضت عيني لحظة.. أمي طول عمرها مكنتش بتنطق اسم مراتي أبداً، كانت دايماً بتعاملها بجفاء. ودلوقتي بتناديها باسمها عشان بس تديها أوامر وتشخط فيها؟
بصيت ل أبويا، كان قاعد بيمزمز في كوباية شاي وكأن الموضوع عادي جداً. سألته بذهول مين الناس دي يا بابا؟
رد ببرود دول قرايبنا.. جُم من البلد يقضوا كام يوم.
بصيت له بصدمة.. إحنا ملناش قرايب بالشكل ده، ولا عمرهم اتذكروا، ولا ليهم أي حق يقعدوا في بيتي ويحتلوه كده.
على العشا، قعد تسع تنفار على السفرة. تسعة.. ومراتي؟