مفتاح الخزنه انجى الخطيب

الخزنة، الظابط، الكلابشات، صمت أبويا، واعتراف أمي إن البيت ده من حقها. في نص الكلام، نور حطت إيديها على بوقها وهزت راسها.
كنت طول الوقت بفتكر إني لو فضلت هادية وساكتة.. الكابوس ده هيعدي، قالتها بدموع.
عمره ما كان هيعدي.
عارفة.. بس مكنتش عارفة أعيش بأي طريقة تانية.
نزلت إيديها من على وشها ومسكتهم إنتي عيشتي ونجيتي بامتياز.. ودلوقتي عمرك ما هتحتاجي تعملي كده تاني.
الأسابيع اللي بعدها كانت عبارة عن ورق، تغيير كوالين، وحزن متغلف بمهام روتينية.

العيال اتسلموا لأخت سلوى في منطقة شعبية، وده ضايق نور أكتر ما بينت، لأنها بنت أصول وقلبها واجعها على عيال ملهمش ذنب حتى لو جُم كجزء من نصباية. أمي وكريم اتوجهلهم تهم شروع في تـ,ـزوير، وتشكيل عصابي، وانتهاك حرمة اتصالات، وسـ,ـرقة مستندات مالية وورق شركات. سلوى اتضاف عليها قضية تـ,ـزوير قديمة اتفتحت من تاني.
أبويا جاب محامي وطلب يتعاون مع التحقيقات فوراً.
اعترف إن أمي اتعرفت على كريم في ندوة عن الحلول العقارية عن طريق واحدة صاحبتها. كانوا محتاجين بيت ورقه سليم، صاحبه مسافر، والأصول بتاعته جوه. بيت التجمع مكنش صدفة.. أمي اللي عرضته عليهم!

ولما كريم عرف إن البيت لوحده هيجيب قرض ملايين، بدأ يسأل عن ورق الشركة كمان. الفيلّة كانت هتبقى أول ضـ,ـربة.. مش الأخيرة.
نور مارجعتش تنام في أوضتنا الأساسية علطول.
أول أسبوع نامت في أوضة الضيوف لأنها قالت إن الأوضة الكبيرة لسه ريحتها توتر. معارضتهاش. التعافي بالعافية ده مجرد سيطرة متزوقة. بدال ما أضغط عليها، دهنت أوضة الفطار اللي كانت بتكرهها لون جديد، رميت الكراسي الصغيرة اللي أمي كانت بتجبرها تقف عليها عشان تطول الرفوف، غيرت كراسي السفرة، وغيرت كوالين البيت كله رغم إن النظام الإلكتروني كان كافي، بس التفاصيل بتفرق.
الأكل كمان كان بيفرق.

في الأول كانت بتاكل بحذر.. كأنها بتعتذر للطبق إنها عايشة. كنت بلاحظ كل تردد، كل مرة تسألني أشيلك الباقي؟، وكل خضة لما جرس المايكروويف يرن. فبطلت أعمل للأكل حوار. مفيش كلي عشاني، مفيش وقفة فوق دماغها، بطلت أعامل الأكل كأنه امتحان. بقيت أطبخ فراخ ورز، أعمل جبنة سايحة نص الليل، شوربة طعمها دفا مش طعمها مراقبة، وأسيب البواقي في علب شفافة عليها تاريخ، لأن النظام بيبقى رحمة لما كان في يوم من الأيام سلاح بيعذبوك بيه.
في الأسبوع التالت.. طلبت تغرف تاني.
كنت هعيط في المطبخ وعملت نفسي الكتمة بتاعت الفلفل الأسود دخلت في عيني.
البيت اتغير معاها.