صوت كعب حذائها
بإشراقة تواجدت فيروز في شركة عمها، من بداية اليوم وهي متحمسة ولقاء أمس يبعث في نفسها البهجة، استعدت للذهاب لمكتب عمها بعد ما علمت بطلبه إليها، دخلت بأدب واستقبلها كمال بود قائلًا:
_ اقعدي يا بنتي
امتثلت فيروز وجلست بابتسامة ممتنة، قال كمال لها:
_ مرتاحة في الشغل هنا؟
_ الحمد لله، أنا لو فضلت أشكر حضرتك على الفرصة دي مش هقدر أوفيك حقك أبدًا
_ ما تقوليش كده أنا قلتلك إنك زي أسيل
ثم صمت قليلًا وبجدية قال:
_ بس ليه شايف إنك مش متمسكة بالفرصة زي الأول يا فيروز؟
على الفور تساءلت بقلق:
_ ليه حضرتك بتقول كده؟
_ قاسم عمران
وعلى ذكره تراجعت بظهرها للخلف وبحيرة هتفت:
_ ماله؟
تحرك القلم بين أصابعه وبعينين بهما الكثير من الحديث والتساؤلات:
_ مش شايفة إن دخول قاسم حياتك كان سريع جدًا، يعني إنتِ ما تعرفيش كل حاجة عنه
بحيرة قبضت حاجبيها وبعدم فهم هتفت:
_ أنا مش فاهمة في إيه، وإيه علاقته بالشغل هنا؟
ترك القلم وتراجع بظهره محدقًا بها:
_ قاسم طلب مني إنك تشتغلي في شركته، حقيقي فاجأني بطلبه ده
أخفضت رأسها حرجًا من فعلته دون حتى أن يخبرها بالأمر، فأكمل كمال بجدية:
_ كنت أحب إنك تيجي وتحكي لي لكن قاسم ما استناش وكان واثق من طلبه
بارتباك رفعت رأسها وهي تفرك يديها ببعضهما قائلة:
_ أنا كمان اتفاجئت بطلبه ده، قاسم بيحاول يقرب مني وأنا خايفة ووضحت له ده فكان كلامه إنه عايز فرصة أعرفه وإنه يكون موجود في حياتي، وعمري ما كنت هاخد خطوة في أمر من غير ما أرجع لحضرتك فيه
أومأ برأسه باستحسان وأجابها مسترسلًا:
_ قاسم جزء كبير من حياته غامض ومش معروف، سفره وهو صغير ورجوعه رجل أعمال قوي الكل بيعمل له حساب، تاريخ والده في عالم رجال الأعمال ساعد إن اسم عمران ما يتنساش لكن قاسم رجعه أقوى وأشرس، مش بخوفك يا فيروز لكن عايز أوضح لك جزء من الصورة اللي الكل يعرفه أما الباقي لو قررتِ تديله فعلًا مساحة في حياتك يبقى إنتِ اللي هتعرفيه لوحدك أيًا كان هو إيه
تسلل الخوف قلبها مرة أخرى، وبحيرة نظرت له تطلب المساعدة بخوف ورجاء، تستمع لكلام عمها والتي تشعر أن في أعماقه يحذرها من الاقتراب، أم تستسلم لذلك الذي وقف أمامها أمس يطلب وصالها، تتجاهل ذلك الشعور بداخلها وحالة الشغف الحديثة أم تهرب ولا تنظر للخلف؟ خرج صوت عمها وأخرجها من شرودها، فانتبهت له وجدته يبتسم لها بطمأنينة قائلًا:
_ ما حدش يقدر يجبرك على حاجة يا فيروز، وقاسم لو في نيته يدخل البيت من بابه يبقى لازم يعرف إن الحكاية مش سهلة كده
